.........اعداء السياسة.... .
بغيت كرسي ف القبة
الحصانة ومعاها الحبة
نلبس السلهام وندير الجبة
باش نداري فضايحي ونتخبى
نراوغ ، نكذب ونضحك على المواطنين
نطرح سؤال مايهمنيش الجواب
الحضور عندي اكثر منو الغياب
هذي عادة عند جل النواب
عديان ف القبة وبرا اصحاب
مسرحية بعنوان: حاشا واش حنا منافقين
نبدى بمصالحي الشخصية
اللهم ارحمني عاد ارحم والدي
نضمن تقاعدي ندير امزية
وذوك اللي صوتو علي
لكثير فيهم واكلين وﻷصواتهم بايعين
انا ماتهمنيش وضعية البلاد
المهم عندي مستقبل الولاد
باغي ندير شي مشاريع جداد
نشد ابلاصتي وندق الوتاد
دخلت من الباب او من الشرجم فايز ف الحالتين
نجمع ونلم ونشم الخبار
كول ووكل هذا هو الشعار
تعلمتها حكمة من الفار
الى تسد غار يتحل غار
وراه جميع الغيران ف وجهي محلولين
طالع هابط واكل كيف المنشار
بحال الليل عندي بحال النهار
برلماني كنت انا او مستشار
حيت محسوب من الناس لكبار
وهذا هو حال خدام الدولة المخ لصين
مسك الختام:
ياسادة، ياقادة وياساسة
ياعديان الشعب والسياسة
خشب مسندة على الكراسة
فئة غايبة وفئة نعاسة
اشريتو الدنيا وبعتو الملة والدين
غدا ف اليوم الموعود
امام الله الواحد المعبود
تلقاو كلشي ف كتاب موجود
وتكون جوارحكم عليكم شهود
لا جاه يحميكم لا مال ينفعكم ولا بنين.
.......بفلمي محمد بلحاج المحاجر....06/03/18.
ليست هناك تعليقات:
إرسال تعليق