.فصل الربيع

Ahmed Naciri
*****

.......فصل الربيع.....

ما كرهت ليا يطول لعمر
ونشوفك يافصل الربيع
بزهر وورود ونواور....
....
لعندك تديني لمحبة
ولبلادي نمشي و نديع
نتسارا قبايل و دواور...
.....
نشوف بلعمان يلالي
وفي فدان يطوال ويشيع
و حتى الفلاح ما ليه يشاور...
....
وسط زنيكة سبحان الله
وفدان زرع بسبول رفيع
وشجر زيتون وكرم ليه يجاور...
.....
ندور مع بهايم وكسيبة
ومن الغنم قطيع
والراعي بعصاتو ليها يحاور...
.....
خرفان تجري وتلعب
والنعاج روسهم وسط الربيع
والحولي بقرونو باين وظاهر....
.....
النعجة تصييح
ولدها يجيها سريع
من ضرعها يرضع .وذيلو بالفرحة طاير...
....
هذا جبح ..هاذي كبة
والنحل فكل مكان يديع
ومن لدغو انا مكوي وصابر...
.....
الطيور تغني
وفراك فراك يطيروا جميع
وشي ف عشو قارق وساهر...
....
ريحة فايحة زوينة
والطبيعة بلون بديع
و ربي من رسم لوحة ومناظر...
....
الشمس بارقة والسما زرقا
وما أجمل جو الربيع
وريحة زهر وشجر ونواور....
.....
زريبة فيها نشوف
وقصيل مرعي بعجول البيع
والعلف للبقر فازك ف مجاور....
.....
ملي تقرب الشمس تطيح
تبدا البدوية بحليب ورضيع
وتعكف العجل ماتبقى فيه زطاور...
.....
الله على جمال البادية
زينها يكمل وقت الربيع
سير ليها وزورها بلا ما تشاور....
....

...........أحمد الناصري......