قصيدة اهديها لروحي امي رحمها الله
بعنوان
الركبة
بسم الله باش بديت
وعلى نبينا صليت
ركبتي ماشي بحال الركابي
على ركبتي لي ضاعب بكيت
شمسها ضاوية و برضاها تغطيت
عرgها مبلل كل ركان لبيت
الا فات الفوت مابقا تنفع كلمت ياريت
مشات لي كنت انا هاني وهي ماتقول عييت
مشات لي كنت انا نايم في احلامي
و هي فايقة ما تقول كلييت
ركبتي ماشي بحال الركابي
مشات الركبة
وتوسدت العتبة
مبقا يجيني معاس عايش في نكبة
سمع كلامي وتهلا في الركبة
وشملها بلمحبة ولمحنة
ندعي معاك تكوني حورية
من حوريات الجنة
ركبتي ماشي بحال الركابي
ركبتي ضاحكة ماتعرف نفاق
تخيط بخيط ابيض الا كان شي فراق
ما تعرف لا بهتان لا كدوب لا زواق
شوفة منها تشفي قلبي من حر لشواق
ركبتي ماشي بحال الركابي
ركبتي كانت فراشي وغطايا
نرتيها ونكتب عليها رواية
بورقة وقلم ودوايا
اه يازمان شلا حكايات بقالو
وحكايت ركبتي حكاية
ركبتي ماشي بحال الركابي
ركبتي حنينة ماتعرف غبينة
زارت لمقام زارت نبينا
بميهة زمزم تسقينا
ركبتي ماشي بحال الركابي
ركبتي زينة ممحتاجة صباغة ولاكحل
رزينة ماتعرف دغل
بابها مفتوح تقولك دخل
كلمتها وحكمتها كاينة البركة
وخا يكون زادها قل
هي صغيرة هزت لحمل
هي كبيرة جمعت الشمل
هي صحيحة هزت التقل
هي مريضة ماتشكي ومن داخلها
تهزل
عبد الهادي ابو ياسر حنيف
ليست هناك تعليقات:
إرسال تعليق