Toufik Rwicha

***

طالب ضيف الله في بلادي
يالحاسبني براني فيها
را هنا كانو اجدادي
شي ايام ما تعقلش عليها
.
زمان الخير والخمير
المطامر عامرة بالشعير
لهيه فين كان البير
حدا ديك النخلة ايلا شفتيها
.
زمان الدوالي والبحير
المطفية عامرة وحداها الغدير
الارض راوية والربيع كثير
وكان جدي مرة مرة يسقيها
.
كان الحرث بالبقر بالجمال بالحمير
الفطور زبدة وخبز الشعير فطير
دكة مشحرة تشربها النعاس يطير
مشااات النية مع مواليها
.
كان الحصاد بالمنجل كي داير
ااييه كنت نلعب حداهم وانا صغير
نجمع السبول وبالفرحة باغي نطير
والحصادة كل ها يغني ف جيهة
.
ما كان حسد ما كان هدا من هدا يغير
كانت المحبة وكلشي يدعي بالتيسير
كانت الجورة عند الكل مقامها كبير
او صلة الرحم لا حد يفرط فيها
.
تفيق الصباح ناشط او بخييير
تشم روايح جميلة يغرد حداك الطير
كلشي تبدل . بنادم مل من التغير
لكن هادي ذكريات ولا واحد ناسيها
.
بقلم توفيق رويشة