فاطمة المسعودي

***

بِينْ الْبَارَحْ وَ الْيُومْ
تْقَلْبَتْ لَدْوَارْ
--
مَلّي كَانَتْ النّية
كَانَتْ الْبَرَكَة
مَا كَانَتْ خْصُومَة بِينْ اجِّيرَانْ
وْ بِينْ لَخُّوتْ مَا كَانْ غْيَارْ
--
كَانْ الرّاجَلْ سِيدِي وْ مُولُايْ
بْ هِيبْتُو...بْ قِيمْتُو
وْ غير بَلَغْتُو فَ الْعَتْبَة
هِيَ حْمَايَة الدّارْ
--
و كَانَتْ لَمْرَا لَالّة مُولَاتِي
دِيمَة مْكَفْضَة وْ لَابْسَة اشْمَارْ
--
وْ مَا تَخْرَجْ الاّ باْجَلّابَة وَ انْكَابْ
و َحَتّى هِيَ لِيهَا رَيْ وْ ِليهَا الشْوَارْ
--
كَانْ الطْحِينْ فَ الْمَزْوَد
وَ الْمَا فَ الَبْيَارْ
--
كُنّا نْطَيْبُو بَالَحْطَبْ وْ لَوْكِيدْ
وْ نَبْنِيوْ بُِْيوتْنَا بَالْمُقْدَارْ
كَانْ لَا مَطَابْ عْشَانَا
يْطِيبْ الَعْشَا عَنْد الجّارْ
--
وْ لَكْتَابْ وْ نْزَلْ لَقْضَا
مَا يَتّفْضَحْ السّرْ
وْ يَتّسْترْ الْعَارْ
--
وَ نَتْفَكّرْ مَلّي كُنْت صْغِيرْ
كُنْت بَاقِي مَحْضَارْ
كُنْت نْبُوسْ يَدْ لَفْقِيهْ
مَا نْهَز فِيهْ عيْن مَا نْهَزْ شْفَارْ
--
و كانو بناتنا
مايرسمو حاجب
مضا يْرَبِّيوْ ظْفَارْ
و غير بالحشمة
يبان لوجه مسرار
--
وَ الْيُومْ تْقَلْبَت لدْوَارْ
الجّارْ وْلّى غْرٍيبْ
مَا يَعْرَفْ بْحَقْ الجّار
--
وَ نْهَارْ يْغِيبُو لْوَالِدِينْ
لما يَبْقَى لْخُو يَعْقَلْ علَى خُوهْ
كُلْ وَاحَدْ يْطِيرْ وَ يْعَلّي
وْ يَخْلِي لَوْكَارْ
--
مَا بْقَاتْ نِيّة
وْ مَا بْقَاتْ بَرَكَة
غَابْ السْحَابْ
وْ هَجْرَتْ لَمْطَارْ
--
طْحِينْ عَادْ بَالْكِيلُو
وَ الماء وَلّى بَ الَعْبَارْ
--
يا َربّي تَلْطَفْ
مَا عْرَفْنا الْعَيْب فِينَا
وْ َلَـ ف ْهذَ الزْمَانْ الْغَدّارْ

***

بقلم

فاطمة المسعودي