البناي:
ياك بوك انا؟
علاش ما فرحانة ؟
راسك رفعي
ما عندك مناش تخجلي
انسان متواضع هذا
البساطة منبع السعادة
راسو مرفوع
وصوتو مااامسموع
وفين ما مشى يكون مقموع
مايهمش كاع ما مخلوع g
انا ما شي مسؤول
كرشي فيها العجينة
او راني مهبول
من عشاق الغبينة؟
نسكن ف هاد البراكة (١)
ولا واحد يقول علي خاون البركة
انا شريف
وعفيف
رفعي راسك
حلي عينيك
هاد العمارات والفيلات
انا وخوتي في الحرفة
اللي بنيناهم وعليناهم
ايه بوك بناي
تيبني ويعلي
وساكن ف بيت مخلي
ياك قالو :""بني وعلي
وسير وخلي""
عارف فاهم :
يزفطو
باش يعفطو
اللي بنى ومات
خلى للولادو اللي ف الحياة
وانا اش غنخلي ليهم
ستة نفوس وامهم
الحصيرة والحسرة
وبراكة فيها القطرة
انا انسان بسيط
كنمشي جنب الحيط
المهم عندي
هو تفتخري بي
تقولي ليهم
باللي بوك بناي
كيوكلنا من عرق الكتاف
خبز وزيتون نظاف
وف الليل ينعس مرتاح
بيا فتاح يا رزاق يبدا كل صباح
بوك يا بنتي
بناي
ماشي خوان
(١)بتضعيف الراء
عمر بنحيدي 19/11/2017
ليست هناك تعليقات:
إرسال تعليق