Nour Abouchama Hanif

***

لغْضِيفْ لمْثنِّي
...
كُلْ رُكْنَة
منْ هَادُوكْ الرّْكاَنِي
تتْكلَّمْ بْحسّكْ ...
يا مَڭْـوانِي
...
السَّمَر ،
مدْبوغ بلُون السَّهَر
وعْسل الرّضَاب ...
هو سيدْ النّدْماني
...
النّجمة سنْتير
ولْڭمْرَة بنْدير
ورقْرَاق النّافُورَة ...
عُودْ لْغِيوانِي
...
لْوَتْرة ،
نشْوة بعْذيب اللّْمَا
ولْهجهوج هَاجْ
وهيّجْ ...
سْكات اللّيل الرّناني
...
السّدْفة تْغير
منْ غَسْقة لْهدَابْ
ولْحَاظكْ سْيوفْ ...
طايْعاك مَ طايْعاني
...
وا لالّة ...
طِيفَكْ مْحارَة
وقدّكْ صدْفة ...
اغْلى من اللّوباني
...
الْمشيَة
غْضِيف مْثَنِّي
والْوقْفة ...
شمّ العَرْنين
قْضيب لْخِيزْرانِي
...
وانا ...
بينْ هادي وْ دِيكْ
عوّام ...
كْسيرالجّناح
فْ بْحَر الزّين ...
غرْقَاني
...
نون . حاء