Abderrahim Younesse

******

" خِيبَة الَحْوَالْ "
-- -- --
رَانِي عْيِيتْ
مَانْسَوَّلْ ؤُنْسَالْ
شْحَالْ فِيكُومْ اتْرَجّيتْ
يَادُوكْ الْعُقَّالْ
يَالِّي كَثَّرتُو لَحْثِيثْ
عْلَى الْفَقْر
ؤُمُعَانَات الْجِبَالْ
مَاعْرَفْتُونِي أَشْ ابْغِيتْ
مَا قَيَّدْتُو لِي لَمْقَالْ
-- -- --
رَانِي مَلْمَحْنَة مَلِّيت
عَانِيتْ يَا اخُّوتِي
اتْزَادْ الْحَالْ
مَاشِي غِير السُّكَّر ؤُالزِّيتْ
بَاشْ ابْغِيتْ انْحَقّقْ الْأَمَالْ
خَصْنِي
جِيشْ مَنْ عَفَارِيت
يِمَدْنِي بَالقُوَّة ؤُالْمَالْ
خَصْنِي لَعْوِينْ
يَا اخُّوتِي حِيتْ
أنَا الْمَهْلُوكْ ، الْمَزْعُوجْ الْبَالْ
لاَ اغْطَا
نَرزَاقُو وَلاَ بِيتْ
انْدَفِّي بِيهْ
رَاسِي ؤُلَعْيَالْ
بَاغِي نَبَرَّعْ
اوْلاَدِي مَا قَدِّيتْ
جِيبِي خَاوِي مَافِيهْ اريَالْ
-- -- --
طَاحْ الظِّيمْ
فْخَطْرَة حَسِّيتْ
بَحْيَاتِي ضَايْعَة
عْدَابِي طَالْ
لاَ طُرقَانْ تَدِّينِي
تْوَصَّلْنِي فِينْ ابْغِيتْ
لاَ مَسْؤُوولْ يَنْصَفْنِي
يِجَاوَبْ عْلَى السُّؤَاالْ
سَالُو ادْمُوعِي
اشْحَالْ ابْكِيتْ
لَلَّه يَا دُوكْ الْعُقَّالْ
فَهْمُونِي
جَاوْبُو " تِيتْ سْوِيتْ "
نَقْذُونِي
عَتْقُونِي مَلَهْوَالْ....
-------------------------------
عبد الرحيم يونس الرغاي--