Med Mehdaoui

******

……….شَتّي ؤُ زيدي شَتِّي…….

شَتّي ؤُ زيدي شَتّيِ
شَتّي يا شْتا تا تا تا تا
يا وْليدات الحرَّاثَة
غَسْلي بنادم
الِّلي راسوشوكْ
وَ ضفَايرو مْناجَلْ
يَحصَد لَزْهارْ
صيفْ وخريفْ
شَتّي ؤُ زيدي شَتِّي
غَّسلي لَقْلوبْ القَاسحة
رَطبي لَجبال الهامدَة
وفَّضْحي لَمْطامَر
العامرة زْرَع غاملْ
مَنْ عرق الناس
خَلِّي لَمواجْ تَركَبْنا
والثَّلجْ يْذَوَّبْ جبال الحقد
فْ قْلوبْنا
نْعيشُو عيشة زمانْ
ناكْلو خير لبلاد
نتمتعُو بْ بَنَّعمانْ
بْعيد على ناس
باعونا لْ غيرنا
قُربانْ
شَتّي ؤُ زيدي شَتِّي
عليكْ لَمانْ
خَلِّي الحَقْ
يَصهلْ وَسط السَّربَة
يَظْهر ويبَانْ
شَتّي ؤُ زيدي شَتِّي
راه الحقْ مَيَصدَقْشْ
إلَّا مْعَ الطُّوفانْ
محمد مهداوي