...
أنَا شِيخْ ...ؤُالبحر غُولْ ، كْلَا عزْ لمْنَامَــــاتْ
رْمَانِي بْ سْهُومْ شَا ڭَّة ، ؤُ كَنْتْ أنَا الرّامِـــــي
...
إِيلا كانْ لبْحَرْ عاجَنْ منْ مْوَاجُو مْرايَـــــــــاتْ
رُوحِي أنَا مْوَاقدْ صَامْتَة جْمَرْهَا دَامِـــــــــــــي
...
ڭلْبِي شْعَا ، شْحالْ فِيهْ منْ مُوجَة شَعْــــــــلَاتْ
مُوجَة تفّاحْ ؤُ مُوجَة نَفّاحْ ... شْفَاتْ سْقَـــــامِي
...
لْمَبْتُورَة نْسِيتْها ، لْمقْهُورَة رْمِيتْها سَــــــــلّاتْ
لوْجَعْ رَدِّيتُو بَسْماتْ ، بْكَانِي ، شَعّلْتُو ضْرَامِي
...
الدّْمُوعْ اللِّي كانتْ شَمّاعَة ... لْيُـــــــــومْ دّلّاتْ
لْڭـلْبْ غَيْمَة ، وْ لْكفّْ رْبِيعْ ... هْطَلْهُمْ هَــــامِي
...
كِيفْ نْمُوتْ ؤُ سَرِّي رَبْعْ مْنازلْ شَامَــــــــــاتْ
مضْفُورَة عْلَى فَنّْ الرُّوحْ ، صَهدْهَا حَــــــامِي
...
شَامَة عرْسْ ، ؤُ لْمَا سلْطانْ طَرّزْ مِيــــــرَاتْ
مِيرَة تْنسِّي فْ مِيرَة ... ؤُ الزّينْ سرّو شَـامِي
...
ؤُ شَامَة غَرْسْ ، النّبْتَة كَوْرَتْ فْ لْهمَّة نبْتـَاتْ
الرّيحْ مرْسَالْ ، الذّمّة فْ النّيّة ؤالتّْرَابْ ظَامِي
...
ؤُ شَامَة تَالْتَة ... ڭرْ ڭاعْ نَقّا بِيتُو شَجْــــــرَاتْ
النّحْلَة زَهْرَة ، تْغَنّي ڭَـمْرَة ... لْفَرحْ طَــــامِي
...
ؤُ شَامَة رَابْعَة ... نَادرْ تْعَنّْڭُو فْ الظّلّْ مَطّاتْ
مَطّة حْبِيبَة وْ مَطّة زْبِيبَة ، ؤَ مَطَة سرْغْرَامِي
...
أنَا هَادَا ، وْ عْلَاشْ نْخافَ أَنَا منْ الجَّايّـــــــاتْ
ؤُ ڭلْبِي رْمَادْ ... لْعَنْقَا مْسوْكَة فُمّي وْ حْلَامـِـي
...
نون . حاء
ليست هناك تعليقات:
إرسال تعليق