محمد الشافعي

36 min

بهات لغرام 
ف گليبك يالولهان
يالرّاثي يام زاهيا
ضاع معاها شْبابو
شمس الزمان القاسية
شوهَت للْوانْ
وماصيرنا الگدام
ماقريناش حْسابو
ماكان فْنيتْنا
تبدّل لّحوالْ
بْحالْ فْلَمْصايْبْ
لا حال بحالو
ما كان فالظّنْ
إيجي حالْ
تقْطَعْ فيه العادَة
وحْكامْ وشْروطْ
فالشَّرْعْ تْگالو
مَنْ گال لقلوب العاطفة
ترمي بالشّرْ
والرحمة منها
طِّيرْ وتهْجرْ
وتْبيدْ لَمْحَنّة
والحب يكسادْ
وما يتْصانْ عاهَدْ
كيف كان فيامْ
لَسْلافْ ولَجْدَادْ
إلى العافية
منْ عاتْها تولَدْ الرْمادْ
عْلاشْ الما الصافي
نابَعْ منْ جوفْ لَرْضْ
يتركوه السّگاية
وفْقاعْ البيرْ
يرْكاَدْ ويفْسادْ
غير الكون ليدامْ فصْباغتو
هالنْهارْ بْشمسو
هالليلْ والنْجومْ شْهاد
هالَجْبالْ شامْخَة
گْبالَتْ عيْني
وثابْتَة كيلُوتادْ
هالَبْحَرْ بَضْبابْتُو
ومْلُوحْتُو خْثَارْ وعْقادْ
بَمّاجو الْعالْيَة يَتْمَاخَضْ
مَرّة يَتْكَمّشْ
مَرّة يَتْزادْ
لَكْريمْ بَايْنْ ولْدْ خيمَة كْبيرَة
والرَّعْوانِي مايَتَّحْسَبْ عَ لَّجْوَادْ
شي بْنادَمْ يتْبَخْتَرْ
وِتْكَبَّرْ
والنّقْصْ طْبِيعَة فْلَعْبادْ
الضْبَعْ نَافَسْ السْبَعْ فَالزْعامَة
دْعَى بالْقوَة
وهزُّو فْلَعْنَادْ
الدّنْيا صْعيبَة ياهْلِي
وبَدَّالَة
تْرَكَّبْ لِي صْغِيرْ شَانُو
وتْنَزَّلْ ٱشْدَادْ
لوْ كانتْ ٱدُّومْ ياسْيادِي
كُونْ دَامَتْ ٱلْشَدَّادْ
محمد الشافعي19/10/2017