محمد الشافعي

3 min

زَهْقتْ روحْ ٱلحَقْ
كانْ حَظُّو فٱلدَّنْيا قْليلْ
الظّلْمْ عْلى گنازْتُو شَطَّاحْ النّفْسْ ٱلطَّاهْرَة تْهانَتْ
تشْكي مَنْ حمْلْ ثْقيلْ
وهَمْ مُحالْ يَنْزاحْ
هي ٱلنَّفْسْ ٱلْبارْدَة ذْليلَة
دخّانْ مْعَ ٱلْغَيْمْ ٱلثْقِيلْ
يمِيلْ مْعَ لَرْياحْ
نْفُوسْ شْريفَة فٱلْهَمْ غايْسَة
وفٱلدنْيا ذايْگة ٱلْويلْ
وٱلليلْ تْسَهْرُو نْواحْ
شي قَوْمْ نْفوسْها عْديمَة
فٱلذْهالَة ماليها مْثيلْ
لَحْرامْ عَنْدْها مُباحْ
ٱلظُّلْمْ ٱلْيومْ عْلَا عْلامُو
فْهَالدَّنْيا وضْوَا قَنْديلْ
عَٱلْباطلْ ٱلْلسانْ فْصاحْ
شْهادَةْ ٱلزُّورْ شايْعَة
ودْموعْ ما مْسَحْها مَنْديلْ
شْكَى ٱلْمظْلُومْ ونَاحْ
دْرُوبْ ٱلدَّنْيا عْفانَتْ
مانْقِيَّة ما طَهَّرْها غْسيلْ
فْسادْها سَاحْ ورَاحْ
قْليلْ ٱلنّية رْمَى نْشَابُو
طَبْعُو طَمَّاعْ وبْخِيلْ
مَالْ ٱلسَّرْقَة حسْبُو رْبَاحْ
لَقْوِي طْغَى وتْعَدَّى
وٱلضْعيفْ بْضُرُّو عْلِيلْ
ينِينْ فمْسَا وصْبَاحْ

-......ساح وراح:راح أي أعطى رائحة

محمد الشافعي