‎حسن صبي

عرفتو آش ينكد الخاطر ؟؟؟
عزبة و گاشوشها رمان
عايشة بين مخلب وناب
مديح كلو كذوب بهتان
ماعارفا غلط و لا صواب
عرفتو آش ينكد الخاطر؟؟؟
عزري شاب بين الدفاتر
وناضل يضمن المستقبل
مرة يراجع ومرة يحاضر
و لقى راسو فالآخر معطل
عرفتو آش ينكد الخاطر؟؟؟
الراجل طيب والمرا مكارة
غير هازة شوكة العگرب
مزوجا بيه عل قبل الشكارة
لفعة مسمومة لسانها يعطب
عرفتو آش ينكد الخاطر؟؟؟
واحد حاسبو توأم الروح
تكشف قدامو كل سرارك
تگول مايقدر بسري يبوح
وهو فين مشا ناشر خبارك
عرفتو آش ينكد الخاطر؟؟؟
تريكة تعيا فيها ما تربي
و تطلب الله ليها الهداية
نتا لعيوبها تحاول تخبي
وهوما يلبسو ليك الصاية
حسن صبي....