Nour Abouchama Hanif

******

زجلية راشقة ليها – كْلَامْ فْ السّيَاسَة
...
مَلّي ضَحْكَاتْ لْغَيْمَة بْلا مَـــــــــا
خَرْجَاتْ منْ صِبَاعِي ثَلْثْ خَيْبَاتْ
اللّولَا ، مْفَرْشَة لْحَلْمَة وْسَـــــــــــــــادَة
الثَانْيَة ، غَارتْ منْهَا زْيَــــــــــــــــــادَة
ؤُ الثّالْثَة ، تْرقُصْ بْلَا عَـــــــــــــــرْسْ
مْسَخْنَة فْ الزّفّة ، طْعَـــــــــــــــــارجْ
لْمِيرْ ، اطْوَلْ مَنْ بَـــــــــــــــــــــلّارجْ
الضّيفْ غَمّسْ فْ لْمَرْقَة رجْلِيــــــــــهْ
جَارُو نْسَا مَا سَوّلْ لفْقِيـــــــــــــــــــــهْ
...
مَلّي ضَحْكَاتْ لْغَيْمَة بْلا مَــــــــا
جَرْحَاتْ صِبَاعِي ثَلْثْ خَيْبَــــاتْ
ؤُ لْجُرْحْ دُخّانْ بْلا عَافْيَـــــــــــــــــــة
لْعَافْيَة شَافتْ لْمَـــــــــــــــــــــــــــــــا
دَارتْ رَاسْهَا طَافْيَـــــــــــــــــــــــــــة
وَانَا بِينْ دَمّي و لفْرَاجَـــــــــــــــــــــة
كَالتْنِي لمْراثِي لْحَمْ دْجَاجَــــــــــــــــة
سَوّلتْ لفْقِيهْ فْ بِيرْ عْلَامُــــــــــــــــو
عْطَانِي بْ لْكٌفَا ، سَرّو دَارو كٌدّامُــــو
...
مَلّي ضَحْكَاتْ لْغَيْمَة بْلا مَــــــــا
حَرْجَاتْ صِبَاعِي ثَلْثْ خَيْبَــــاتْ
لْخَرْجَة ؤُ الجّرْحَة ؤُ لْحَرْجَــــــــــــــة
ثَلْثْ عْكَاكَزْ لْمُولَاتِي عَرْجَـــــــــــــــة
لفْطَامْ عْدُو، نُوضْ بَرَكَة عْلِيـــــــــــكْ
لْغِيتِي لكْلَامْ مَ بْقَى مَ نْوَرِّيـــــــــــــــكْ
لْفَاهمْ يِفْهَمْ ، ولْدْ لْغَمْــــــــــــــــــــــزَة
ؤُ قَاصحْ الرَّا سْ ، خَاصُّو دَبـــــــــْزَة
...
مَلّي ضَحْكَاتْ لْغَيْمَة بْلا مَـــــــــا
مَجَّاتْ صِبَاعِي ثَلْثْ خَيْبَــــــــاتْ
لْقِيتْ اللّوَالَا لَاحُو لْعَلفْ إيلَا بَاتْ
ؤُ سَخْنُوهْ ، إِيلَا فَــــــــــــــــــاتْ
...
نون حاء