دور يا موري دور
بغيت نقرا معاك داك لي راح.....
دير ليا خاطري و رجعني اللور
نقلب عل اللحيا ولمكانو فين طاح....
بيني و بينو لقيت الصور
وبلاه بانت غير لهموم ولجراح....
غبرت الزكاة وتخفا لعشور
والكرش وساعت وخنزها فاح...
......
دور يا موري دور
بغيت نقرا معاك داك لي راح...
شبابي كنت فيه ناشط ومسرور
والقلوب البيضا عليا حليبها ساح....
كنت شجرة مفننة وراوية لجدور
واللسان الرطب ليا بكلامو باح....
مابقى تواضع وكثر لغرور
وبنادم من خيرو زير و شحاح....
......
دور يا موري دور
بغيت نقرا معاك داك لي راح....
ما بقى لي على افعالو مشكور
وظهر غير لي شاري لشرو مداح...
وهو بحال الدلو مكعور g
لي ماه من قاعو شرول وساح....
أنا وليت بغرايبو ديما مضرور
وما نعمت لا براحة ولا بأفراح....
.....
دور يا موري دور
بغيت نقرا معاك داك لي راح....
ليست هناك تعليقات:
إرسال تعليق