امديمي :بقلم الاستاد احمد الناصري

.......أنا مديني....

تبعت كلام مراتي
ودرتو  ليا راي
وحكمت عليا بريحها
نولي معاها مديني....
.....
بعت بلادي بعرصتها
وبعت بهايمي و الدار
وهي بكلامها تشجعني
وعل الدوار غمضت عيني....
 ....
هزيت الرحيل
وسامحت ف ترابي
والدموع بالبكا
قربت تعميني....
......
الجيران يشوفوا
والحبيب فيهم لينا يودع
وفراقهم صعيب
والندم ولى يكسيني...
.....
حطيت في حي مهمش
وفيه كريت ونزلت القش
حتى النعاس ما بغى
ف الليل يديني....
.....
بين الحيوط قل النظر
والعقل ولى غايب
بعت بلادي بدريهمات
حرقتها ولات تكويني....
......
سكنت ف زنقة مهمومة
ولي حداها مايعجب
بنادم غير غادي دايع
وفين ريحة الزهر لي تهجيني...
.....
غاب الحيا وبنادم عريان
ما بقات رحمة وخا جيران
غير يدخلوا  ويسدوا البيبان
حيث مخي ما فكر.. وبغى يجليني...
.....
جيبي ولى يخوى
ومول الحانوت ما يعف
وفلوس البلاد مشات
وتمنيت الموت كون تديني...
.....
توحشت طياب الدخان
والرفيسة بالزبدة ولحليب
مالي على حالتي أنا
غير الفورص وجعو يلويني...
.....

راي مراتي كان سباب
زادني محنة وعذاب
ياريث كون شاورتها
ورايها ..لالا..وخا ما تبغيني...
.....
...........أحمد الناصري......