Nour Abouchama Hanif

*******

علّامْ لْمُوتْ
...
الطّعْنَة
جاتْ مْكَحْلَة عَينْ
ؤُ مْسلْفَة عَينْ ...
طَعْنَة نْدِيبْ ؤُ طَعْنَة دِيبْ ...
عرّاتْ لْموتْ منْ سلْهامْ لْعَزْلَة
غَطّاتْهَا بْ كْفنْ لْغَمْرَة ...
ساحتْ تَ ساحتْ
دسّاتْ لْهَمْ فْ شّلّا اعْرَاسْ
ؤُ درْسَاتْ اصْباعْ النّورْ ادْرَاسْ ...
اللّيلْ نْهَشْ نَبْزَة منْ لْحَمْ النْهارْ ...
ؤُ النْهَارْ اضْحَكْ لمْزَة
عْلَى رَقّاصِ لْوقتْ
اللّي مَ جابْ اخْبارْ ...
لْغَوتْ عرّى راسُو
ڭفّضْ عْلى اكْتافْ لخْدِيعَة
اكْتفْ وَرْدَة ؤُ اكْتفْ شُوكَة ...
ينْتَفْ ملْ لحْمامْ رِيشَة
يلَقّمْ بِيها بِيطانْ مُوكَة ...
جِيتْ نْسَقْسِي الزْمانْ
ملّي داخْ منْ كفّي برْهانْ ...
لْقِيتُو امْسوّكْ منْقَارُو
بْ دمْ جارُو ...
حاطْ عسّاسْ عْلى دْيُورْ النّاسْ ...
ومْشعّلْ اشْمِيسَة عْلى دارُو ...
و جِيتْ نفْهَمْ
لْقِيتْ لْهمْ
سْبَقْنِي و ارْكَبْ ادْهَمْ
علّامْ امْعَلّمْ
عَوْدُو امْطَهّمْ
سَرْجُو مْرَشّمْ ...
لْحَرْكَة طايْعاهْ
ؤُ السّرْبَة تابْعاهْ ...
ملّي خَرّجْ فْ عَيْنِي بارُودْ
فقتْ منْ لْحلْمَة ...
لْقِيتْ شِيخِي احْدايَا ...
لابسْ الضّحْكَة اعْبَايَة ...
امْسَحْ اجْبِينِي بْ كفْ الرّحْمَة ...
سمّى لعْظِيمْ ...
خرْجَاتْ اعْرُوقِي من الزّحْمَة
...
نون حاء