Nour Abouchama Hanif est avec ‎سعيد فرحاوي‎ et 3 autres personnes.

24 min · 

عْرُوسْةْ لْمِيرْ
...
جابْ فْ شْوارِيهْ تلْتْ ا ڭـلُلْ
وحْدَة ، سْمنْ ...
وحْدَة ، عْسلْ ...
ؤُ التّالْتَة ، ڭـلّة ڭطْرانْ ...
سمّى الله
ؤُ حَطْ فْ إيدْ لْعالِي شُونُو ...
شْرَبْ ظلْ الشّجْرَة لُونُو ...
طَاحتْ تلتْ تَمْراتْ ...
شْكونْ فيكُمْ
مْعَنّڭـهَا الزْهَرْ لِيلْ ؤُ نْهارْ ... ؟
ؤُ شْكونْ فيكُمْ
تْفُكْ سرْ لْكلْمَة بْلا مَا ... ؟ ...
ؤُ تْجِيبْ منْ ڭلبْ التْرابْ
اخْبَارْ ... ؟ ...
لكْبِيرَة شَافتْ السْمنْ
فْ كفْ النْسَا ،
ولعْسَلْ قْطافْ النّعْسَة ،
ؤُ لْڭطْرَانْ حْرُورْ التّعْسَة ...
اللّي اكْبَرْ منْهَا ظَنّتْ السْمنْ
فْ عَينْ لعْرُوسَة يُومْ ،
ؤُ لعْسَلْ يُومَينْ ،
ؤُ لْڭطْرَانْ شلّا ايّامْ ...
التّالْتَة ، سكْتاتْ ...
ملّي شافتْ عْقَلْ الزّرْبَة بْهَاتْ ...
ڭالتْ : نْسوْلَكْ آ سِيدْ لْعارْفِينْ ،
احْنا منْ شَجْرَة ، ؤُ نْتا ، مْنِينْ ... ؟ ...
أنا نْرْقُصْ بِينْكمْ ؤُ بينْ السّلْطانْ ،
ولْدُو لْمِيرْ داخْ منّو بُرْهانْ ،
زْواجُو فْ ڭلّة منْ تْلاتَة ،
ؤُ وحْدَة فِيكمْ شَجْرَة رُمّانْ ...
آشْ بانْ لِيكْ آ لالّة ...
ڭالتْ ؤُ الرّاسْ جلّة :
لڭلُلْ ڭلّة ، هِيَ لمْرَا ،
ؤُ لمْرا تَمْرة اسْقَايَة ،
سْمنْهَا عْنايَة
ؤُ عْسلْهَا دْرَايَة ...
ڭالْ ؤُ لْڭولْ امْرَايَة :
ؤُ لْڭطْرانْ ؟ ...
ڭالتْ : اللّفْعى ساكْنَة مْعَايَا
...
نون . حاء