فاطمة المسعودي

********

--عْيِيتْ نَحْسَبْ وْ نَرْتَاحْ
---------------------
عْيِيتْ نْعَدْ فَ هْمُومِي
نَحْسَبْ وَ نَرْتَاحْ
وَ نْدِيرْ مَنْ الصْبَرْ دْوَايَا
--
مَالَكْ يَا ليّامْ
كَثّرْتِي عْليّا لًجْرَاحْ
جُرْح يْنَسّينِي فْ جُرْح
آهْ يَا مْحَايْنِي وْ مَڭوَايَا
--
عْييتْ نَبْكِي وْ نَشْكِي
مَنْ هذْ الزْمَانْ الْڭرّاحْ
مَا حَنْ مَا كَرْ فِيهْ بْكَايَا
--
سَوّطْنِي بلَا عَفّة
وْ مَا ڭلْتْ احْ
وَلّفْت ضَرْب السَّوْط
عْلَى ظَهْري وَ ڭفَايَا
--
يَاكْ حْمَلْتِي بِيّا شَرْعِي
عْلَاشْ تَرْمِينِي طْرَاحْ
مَلِيُوحْ فَ دَرْب مَظْلامْ
مَا لْڭيتْ فِيه دْفَايَا
--
شْرَبْت كَاسْ لَسْقَامْ
بْغِيتْ نَنْسَى هْمُومِي
وْ نَرْتَاحْ
وَاشْ يَمْكَنْ الدّا (ء)
نْصِيبْ فِيهْ دْوَايَا
--
تّبْلِيتْ وْ بَالْبَلْيَة
نْدَاوِي لَجْرَاحْ
وْ زَادَتْنِي بْلَا عْلَى بْلَايَا
--
يَا زْمَانِي رَاكْ قَتّالْ وْ ذَبّاحْ
بْلَا فَرْدِي ْبلَا سْلَاحْ
تدْفَنْ وْ تَمْشِي معْ َالعَزَايَة
--
خْلَقْنِي رَبّي فِيكْ
مَا نِي خَمّاسْ
مَا نِي سَرّاحْ
وَ فْ بَابَكْ
تْعَلّمْت السْعَايَا
--
لَضْيَاقَتْ الرّبڭة
عَنْد رَبّي تفْسَاحْ
وْ تَبْقَى يَا هَذْ الزْمَانْ
كِي الْخُبّيرَة
كِي لَحْكَايَة
-------------------
فاطمة المسعودي
--------------------