Wafaa Oum Hamza Jlida

****جروح لبارح ***

بينْ مْسا وْصْباحْ
فاقَتْ جْروحْ لْباَرَحْ
طاوْعاتْني مُدَّة 
غابَتْ
وكان گليبي فارح
تيقتها
وْدَرْتْ النِّيَّة
وْنْسيتْ
عْطاتْني بْكَفِّى
تَحْسَبْ لْيومْ وْغَدَّا
إِمْتى تْفيقْ
وْلْيومْ طَلْقوا لَسْراحْ
شَعْلَتْني هْمومْ
عْواصَفْ فِيا تْنوضْ
وْعْواصَفْ فِيا تَهْدى
تْوَسَّدْتْ صَدْري
عْلى بْوابو
تَبْكي وْتْنوحْ
منْ هْوالْها
تَجْبدْ هْمِّي فْهَمُّو
حَلْ فَمُّو
وْبانَت لَجْروحْ
شهق شهقاتْ
حْسَبْتْها جْراحْ صْغيرَة
ظْفايَرْها قْصيرَة
مازالْ حْليبْ أمْهَا
مابينْ ضْراسْها
مازالْ دَّمْها عابَدْ
فْمَحْرابْ ساسْها
ظَنِّيتْها مازالا
لْحمَة مْلَحْمَة
مْكَمْشَة فْكْماطْها
تْزَكِّي فْعْياطْها
بْرَوْلَتْني غْواتْ
كُنْتْ نْظَننِّي نِسيتْها
هِي مانْساتْ
كُنْتْ نْكولْ جْفيتْها
لَكِنْ هي ماجْفاتْ
كانَتْ تَرْضَعْ مَنِّي
حْليبْ لَوْقاتْ
تسرقْ مَنِّي
حْلاوْةْ لِّي فاتْ
كانَتْ تَغْزَلْني صَفْحَة مَكْتوبَة
ظَنِّيتْها تَّمْحاتْ
فاقَتْ جْروحْ لْبارَحْ
وْعَيْطاتْ

******

وفاء أم حمزة ج