محمد الشافعي

لا تلوميني

شوفي من حالي وشفقي
رحمي هذْ الْحالة
العين تجري بدموع 
والنار فگلبي شعّالة
جيتكْ ندْمان وحشْمان
لا تْقَوِيها لَمْلامَة
رالْسانْ مْكَتّفْ
بَشْريطْ الحَشْمَة
وحْبالْ الندامَة
لا تْجَمْعي مَ لَّوْمَكْ رزْمَة
ترْميها عْلِيا بشْهامة
لا تْخَلّي عارْ فَطْريقْنا يَتْرامى
إلى فاضْ غَيْظَكْ
طْفيهْ بالصبَرْ
رَالصبَرْ في حَلْ لّمْسايْلْ
ليهْ قيمَة ودْلالة
عَمْلي لْحَشْلافْ بينْ لُگْلالْ
كيفْ گالو الناسْ اللوالى
شجْرةْ هْواكْ خَضْرَة
في گَلْبي ما مَذْبالَة
لَوْ كانْ كْذوبْ حُبّكْ مايْدومْ
كُونْ ذَابْ وسالَ

*************
ْ محمد الشافعي 

24/09/2017