Nour Abouchama Hanif

************************

حْجَرْ عْلى رقْعَة الشّطْرَنجْ
...
مَ يعْقَلْ رقْعَةْ لحْجَرْ غِيرْ سِيدِي دَارِي
ؤُ مَا يْحَرّكْ لبْيَادقْ
غِـيرْ اللّي ڭلْبُو ..
وَرْدَة
...
لحْجَرْ اللّي ربّاتُو الشّمْسْ فْ دَارِي
هَرْسَاتُو شَلّا مْطَارقْ
صَقْلاتْ صَلْبُو ...
شَدّة
...
نَابتْ صَخْرَة ، مَاشِي طُوبْ هَارِي
فُمّي سْنانْ بْلا مْلاعقْ
نَقّاتْ نَقْبُو ...
عَضّة
...
عَضّة ملْ لْبُرْجْ اللّي عَلّا سْوَارِي
عَلّقْ عنْڭي مْعَالقْ
خلْعاتْ رَهْبُو ...
منّي هَدّة
...
ؤُ عَضّة جابْهَا بَهْلُولْ بْلا شْوارِي
فرّشْ طْرِيقِي مْزالقْ
حَرْ ڭاتْ جَنْبُو ...
رُوحِي لْفدّة
...
ؤُ عَضّة رْكبْهَا خيّالْ ڭالُو مْسَارِي
شَعّلْ لْحَرْكَة بْنادقْ
لْقُبْ قُبّو ...
التّْماڭْ فرْدَة
...
ؤُ عَضّة غْواتْ حْجَرْ سَاكنْ مَ قَارِي
زَوّقْ السّْلامْ تْزَاوقْ
نْسَا شُونْ عَيْبُو ...
عَرّاتُو حَدّة
...
ؤُ عَضّة دَرّاتْها لَالّة مِيرَة بْلا مْدارِي
لْقَاتْنِي سلْطَانْ فَايقْ
فْ عزْ حُبّو ...
رَاغدْ رَغْدَة
...
" شْيكْ ؤُ ماتْ " مَ طْفِي مَ تْخَمّدْ نَارِي
شُونِي شْعَا عايِقْ
فْ السّْمَا لَعْبُو ...
لْيُومْ ؤُ غَدّا
...
نون . حاء