Med Mehdaoui

*************

………………...لباردية…………

آولدي مَد لي ذاك الفَردي
نْعَنگُو راه فيه ريحة جَدِّي
مالُو ذبال ؤُ بْهاگْ لُونُو
مال وجهو كحل مصدي
أَرَا نْزَيتُو نحيي عظامُو
راه كان هو دواي أَوَعدِي
كِيفْ نرفع راسي گدام الدوار
ؤُ ساسبُو مَزَال يْبَردِي
فِينْ الصولة گَدَّام الخودات
فِينْ مولات الشَّال الوردي
زمان،كانت الزغرتات تطلب ودي
ؤُمولات لخلاخل تبوس يدي
يا الخيالة علاش نكرتوني
مِين رشاو عظامي وتشنتف جلدي
آه يا ولدي وَجَّد لي الرزة الصفرا
خليني نصول ونجول ف لباس البلدي
الركاب حديد والسرج جديد
خلِّي لَدهَمْ يتباهى يا وَعدي
لزرگ ب حوافرو يرش تراب الرحبة
فالسما نيران صفايحو تگْدي
مين نَخْلِي البارود يَتَّخلع الطير
والسربة تعود تركع ل زندي
آولدي رَكَّبْ سرج لشحم ولا البرگي
راه البارود ،الحبة ؤُ لَمكاحل مَنْ عَندي
خَلِّي الغايطة تصهل صهلة الخيل
والگلال يصاحب طلقة الفردي
الخيل مربوط بالخير ل يوم القيامة
بغيت اليوم يا حبابي نجرب سعدي
والزناسني مربوط ب حبل الرجله
من زمان راسو عالي،فهمو قصدي
احنا امالين الصف،التبراح والبندير
الهندي والبندي والموس من عندي
وِيلَا جات للرجله البارود يطيعنا
سَوْلُو لَفْرَنسيس على تْوَارَخ مَجْديِ
مِينْ كَانَت السَّربه تَخْذَلْنِي
كنت نْقَاوَم لَفْرَنْسِيسْ بْ وَحدِي

*******

بقلم

محمد مهداوي.