الشاعر إدريس لحمر
************************

قاَلْ عَنْدِي لَجْوَابْ

*****

قاَلْ عَنْدِي لَجْوَابْ
كْلاَ ياَبَسْ وَاخْضَرْ
خَلاَّنِا بَالْباَبْ هْباَبْ
وْماَ اطْفَى اجْمَرْ
ماَ اقْبَلْ اعْتَابْ
وْلاَ لْقَى صْوَابْ
سَدْ اشْرَاجَمْ وَابْوَابْ
وْسَارْ كَيْجَرْ
اكْوَى الأَحْبَابْ
وَهْجَرْ الأَصْحَابْ
وَنْسىَ الكْتَابْ
وْبَحْرُوفوُ كْفَرْ
طَبْعُو كَذَّابْ
وْماَ ابْغَى عْتَابْ
مَنْ نْعَاجِي وَدْياَبْ
عْلِيهْا ماَ اقْدَرْ
نْعَقْ الَغْرَابْ
وَسْطْ الَغْيَابْ
بِينْ اسْرَاب
مَعْلوُلَةْ وَيْسُوقْهَا انْسَرْ
عْلاَشْ الضَّحْكَةْ صَفْرَا
مْشَبْعَنَا هَضْرَا
فَزْمَانْ النُقْرَةْ
وَنْحَاسْناَ غْبَرْ
ياَ حَسْرَةْ
ياَ حَسْرَةْ
يا حسرة يا لمرا
زَنْدَاتْ بْلاَ رِيحْ
اسْبَابْهَا رْيُوسْ اْلحَرْبَةْ القْدَامْ
ماَ قاَبْطَةْ تَسْرِيحْ
مَنْ قَايَدْ وْلاَ باَشاَ فَدْلاَلَةْ لَحْرَامْ
رَا قَفْطَانْهَا فْسِيحْ
يْجَرْجْرُوا كُلْ مَنْ ذَاقْ رْيَالاَتْ بْلاَ لْجَامْ
حَتاَّ فْصَالْهَا قْبيِحْ
مْقَوِّي لَعْقَابْ مْكَثَّرْ لَكْلاَمْ وْلُكْجَام ْ
لَسْلاَفْ شَعْلُوا قَنْدِيلْ لَفْرَاجَةْ
هَرْسُوا زْلاَيَفْ
ماَ لِينَا بيِهُمْ حَاجَةْ
هَزْمُوا قُومَانْ
ماَ هُمْ بْلاَدَةْ وْلاَ خْوَاجَةْ
شَمْسْ حَارْقَةْ
حَاجَبْهَا الَغْيَامْ وْالَعْجَاجَةْ
الطِّيرْ الْحُرْ
مَا يَشْبَهْ مُوكَةْ
الصَّبْرْ الْمُرْ
فَالْحَلْقْ نَشَبْ شُوكَةْ
النَّسْرْ تْضَرْ
وَلاَّتْ صَحْتُو مَهْلُوكَةْ
حَتَّى الَفْجَرْ
وَلاَّتْ صْلاَتُو مَتْرُوكَةْ

***************
بقلم ادريس لحمر