وصية امي
***
گالت امي
يا ولدي
عنداك الا شرفت
ؤ خرفت تنفرني
يا ولدي
لا تفهمني بغير
عقلي
غير صبر ؤ سمعني
يا ولدي
الا وسخت كساتي
ؤ ما غطيت عراتي
تفكر لوقات لي كنت
فيها لالة لعيالات
ف ايامي
ؤ الا جاب الله
هدرزت ف لكلام
لا طييح من امقامي
وتمعني بقوافي
يا ولدي راه انا
لي كنت مولات الري
ؤ الشوار والناس بيا
تدوي
يا ولدي
ؤ الا جاب الله
ؤ ما هزتني رجلي
غير گعدني
بعد كنتي اطيح وتنوظ
راه انا لي علمتك
تمشي
وعلا ظهري شحال نقزتي
يا ولدي
لا تزرب ؤ تتمنى موتي
راه يوم الميعاد
لازم نعود لقبري
غير كون صبار
ؤ عطيني وقت انفيق
بي عيبي
يا ولدي
العيب هداف والزمان
إيثلي
وسع الخاطر
خليني نتفكر عگوبي
لا تخلي الشيطان
ايلبسك
وتعود رافد سخطي
يا ولدي حتى الا ما كان
الخاطر ف الطعام
غير خليه حتى نجوع
ؤ ليه نولي
يا ولدي
غير مد ايديك
راه شحال من مرة
ف صغرك مديت إيدي
يا ولدي
الا جاب الله لفراق
غير زور قبري
راه الروح تفرح
ؤ معاك تدعي
***
بقلم : محمد زرواني
ليست هناك تعليقات:
إرسال تعليق