Nour Abouchama Hanif

كَسْكَـــاسْ لْوَقتْ
...
شضْيَة فْ ساحْ لوْعَرْ ... رَاسِي خلّانِي 
ؤُ فْ بِيرْ لغْدَرْ دْلو بْلا شْطَانْ ... دَلّانِي
...

لمّاتْنِي السّدْرَة صْبِيعــــــــــــــاتْ النْبڭ
ؤُ الرّيحْ لِيتِيمَة ... تحْنانْهَا سَلّانِــــــــي
...
قْشُور الجْمَرْ كانتْ وْسَـــــــــــــــــــادَة
لْڭَمْرَة ... كانتْ رْفِيڭْ ، ضَيْهَا سَمّـانِي
...
الرّوحْ لمْتِينَة ، كانتْ زادْ ، كانتْ رْفَادَة
كنتْ أنا ، يوسفْ ... بِيرْ لخُّوتْ جَلّانِي
...
لْعْتامْ خُويَا ... ؤُ سْكاتْ الرّهْبَة ، شْهَادَة
سبعْ بَڭراتْ ، فْ شْحَمْهَا ضاعْ مِيزَاني
...
راسِي تْعرّى منْ خُبْزُو ، الطّيرْ جْرَادَة
صْبَاعِي مَا قْراوْ حَلْمَاتْ مَا فْتاوْ برّانِـي
...
عشْرَانِي فْ الرْطُوبَة مَا غَطّاتْنَا سْقُوفْ
غَطّاتْنا سْرَارْ لْبُوحْ ، دمْ الدّيبْ عَرّانِــي
...
نْشُوفْ لْكسْدَة قْمِيصْ لْوَرْدَة ، دَمْ بَاهـتْ
دمْ الدّيبْ مَا سَالْ ؤُ دمّي سَوّلْ زْمَـــانِي
...
زْمَانِي مَا ، خاسرْ شُونُو، ما سْقَا وردْ
ما نبّتْ سَعدْ ، سَڭّا التْرَابْ مَا سَڭّـانِـــي
...
جِيتْ نْقَفّلْ كسْكَاسْ لْوَقتْ ، لْقِيتْ لْوَقتْ
حَمّاسْ ، قَاعُو حْمُومْ ، جُوفُو رُوحَانِـي
...
ؤُ لِقِيتْ حَقّي لُڭيمَاتْ فْ عزْ الزْحَــامْ
نْسَلْهَا سَفّودْ ، منْ صُوفْ شُوكَـــــانِي
...
لْقِيتْ حَقّي نْهَارْ ، لَبّْسُوهْ نْعالْ اللّيـــــلْ
لْقِيتْ زَهْرِي دَارْ ، تْبعْتُو تَلّانِــــــــــي

...
طْرِيقِي حْجَرْ ، ؤُ الظّلّْ مْدِينَة بْعِيـــدَة
الشْجرْ مْنَامَة ، لْغَيمْ حْلفْ لَا غَطّانِــي
...
شْكونْ خلّانِي ، شْكونْ دَلّانِي شــكونْ
فْ لقْصِيدة لْعَمْيَة ... حـــــرفْ طْرَشْ
دَوّانِـــــــــــــــــــــــــــــــــــــــــــــــي
...
نون . حاء

نور ابو شامة حنيف