توحشت ايام زمان
============
توحشت ايام الصغر
والعطف والحنان
ايام النية او لمة لحباب
ايام لعب الصبيان
لي ما تعرف
دس دس ولا طغيان
ايه يا حصرة على ايام زمان
توحشت جلوس الجماعة
بصينية او براد
ايام سدى المنجج عند البيبان
ونقى القمح بطبق ؤ صيار
ليام لي كان بويا راد الغيبة للجيران
توحشت ايام الطاعة والاحترام
ليام لي كان فيها الولد ف مقام
والبنت تغرق ف الحشمة وسط
لعيان
توحشت ايام الجلابة والنقاب
ايام التشميرة والتخليلة
والتكفيظة على القفطان
ايام الكقعدة لمتولة او قول لحسان
اليوم تكلب الحال او طاح الشان
لا وصية زينة المنكر فينا اكثر او زاد
ايه عليها ايام. اتكفاو لمتارد
والزلايف عاد ليهم الشان
توحشت ايام زمان
ايام خبز شعير او قمح
لمحبوك بطبق او غربال
ايام الدايكة بين الجيران
ايام النزاهة بلمة لحباب
ايام قراية اللوح من سلطان الطلبة
بختم لقران. (القراءن)
ايام الصربة المساوية بزغاريت وعلام
ايام تهدريزة لدهم ؤ لزرق
وتحنحينة البركي والكمري
وحجر الواد
توحشت ديك لعيوط لمساوية
بعتوب ؤ بروال
اااايه يا حصرة على براح زمان
بالله يا سامعين النظام ؤ يا طلبة وعوام
هزو لكفوف للجاه العلام
او صليو على نبينا العدنان
طلبو لكريم يهدي هاد القومان
هاد الدنيا يا لخوان
غاب فيها لحيا والاحثرام
كلشي فيها عاد زربان
الناس تلفت لعبادة ؤ عامت ف الطغيان
الدنيا ما بقات ف ميزان يا حصرة عليها ايام
بقلم. محمد زرواني
ليست هناك تعليقات:
إرسال تعليق