يا فتاح يا رزاق

‎ﻣﺠﻤﻮﻋﺔ ﻧﺠﻮﻡ التراث خريبكة‎

*****

يا فتاح يا رزاق
"""""""""""""""""""

يا فتاح يا رزاق
يا ضامن لرزاق

نترجاوك

يا الكريم ترحم طفل يقاسي
صغير مسكين بيه لحال ضاق

تتوب على شايب عاصي
كبر و شاب و باقي ما عاق

تحن عليا نهني راسي
تبرد لي نيران لشواق

نبرا حتا انا من وسواسي
عييت و مليت من لفراق

نزهر و تثبت غراسي
و يخضارو ليها لوراق

ما نبقاش انا رواسي
نربط و نزير حبال لوثاق

نشوف شي مرا على قياسي
تقنع بلي عطيتها فالصداق

نتهنا و يطيب نعاسي
نعيشو بلا زواق بلا نفاق

نبني معاها أنا ساسي
ما يكون بيناتنا فراق

يا فتاح يا رزاق
يا ضامن لرزاق

نترجاوك

تحن على غريب مسكين يقاسي
ما زال ما صاوب لوراق

اهلو و حبابو ما ناسي
لبوه و ميمتو شتاق

يا فتاح يا رزاق
يا ضامن لرزاق

نترجاوك

تنزل الرحمة يثمرو لعراسي
يزيانو و يعمرو لسواق

يرطاب كل من هو قاسي
يفكر و يحن فخوتو لي شقاق

نهنا انا يفرح احساسي
ملي نصالح جوج من بعد لفراق

يتزوج كل من هو رواسي
يتهنا ويخرج من رحبة الزواق

تحن عليا و على ناسي
ترحمنا يا رحمان راه بينا لحال ضاق

بقلم : عزالدين ناس الرما