لْمَسْخُوطْ

*******

لْمَرْضِي وَلدْ بْلَادِي

وُ لْمَسْخُوطْ مَسْخُوطْ

غِيرْ سَلَّكْ ؤُ عَدِّي

ؤُ بَعَدْ مَنْ رْهُوطْ

مْرِيَرا تْجِيبْ مَ تَدِّي

لْغَاِدِي فِيهَا مَشْحُوطْ

لَا تْگُولْ لْوَلدْ وَلْدِي

ؤُ هٌوَ غِيرْ مَرْهُوطْ

خُبزْ نُخَّالْ مَ يَغَدِّي

ؤُ لَبْكَا غِيرْ بْحُوطْ

زُرَعْ لْفَازَگ ْمْنَدِّي

خَلَّا لَسْگَعْ مَزْلُوطْ

رَاكْ تَكْبَرْ ؤُ تْوَدِّي

ؤُ طَلْعَة تَرْجَعْ هْبُوطْ

ؤُ تْگُولْ مَاشِي قَصْدِي

طَاعَة لْوَالْدِين بِ شْرُوطْ

لَا تَشْعَلْ عْوَافِي تَگْدِي

بَارَكَ مَ تَنْفَخْ وُ تْسُوطْ

تَجْرَحْ لَگْلُوبْ ؤُ تْعَادِي

رَاهْ لْمَسْخُوطْ مَسْخُوطْ

تْعْيَا تْغَوَّتْ ؤُ تْنَادِي

فِ لْحَافَة يِكُونْ مَسْقُوطْ

لِ مَعَنْدُوشْ فِ لَمْسَگِّي

مَ يِكُونْ وَاحَدْ مَغْبٌوطْ

شعيب صالح المدكوري

الرباط 13.10.2017